Канон успению пресвятой богородицы с ударениями

Канон Успению Пресвятой Богородицы

Песнь 1

Ирмос: Преукрашенная Божественною славою, священная и славная, Дево, память Твоя вся собра к веселию верныя, начинающей Мариаме, с лики и тимпаны, Твоему поющия Единородному: славно яко прославися.

Да провождают невещественнии чинове небошественное в Сион Божественное тело Твое, внезапу же стекшеся апостол множество от конец, Богородице, Тебе предсташа абие, с нимиже, Чистая, Твою честную, Дево, память славим.

Победныя почести взяла еси на естество, Чистая, Бога рождши, обаче же, подобящися Творцу Твоему и Сыну, паче естества повинуешися естественным законом. Темже умерши, с Сыном востаеши, вечнующи.

Песнь 3

Ирмос: Содетельная и содержительная всех Божия Мудросте и Сило, непреклонну, недвижиму Церковь утверди, Христе, един бо еси Свят, во святых почиваяй.

Жену Тя мертвенну, но паче естества и Матерь Божию видевше, Всенепорочная, славнии апостоли ужасно прикасахуся руками славою облистающей, яко богоприятное Селение видяще.

Постиже руце досадительныя дерзаго, усечением суд нанес, Богу сохраньшу честь одушевленному Кивоту, славою Божества, в Немже Слово плоть бысть.

Седален

Блажим Тя, вси роди, Богородице Дево, в Тя бо Невместимый Христос Бог наш вместитися благоволи. Блажени есмы и мы, предстательство Тя имуще: день бо и нощь молишися о нас и роди христианстии Твоими молитвами утверждаются. Тем, воспевающе, вопием Ти: радуйся, Благодатная, Господь с Тобою.

Песнь 4

Ирмос: Речи пророков и гадания воплощение проявиша от Девы Твое, Христе: сияние блистания Твоего во свет языков изыдет, и возгласит Тебе бездна с веселием: силе Твоей слава, Человеколюбче.

Видите, людие, и чудитеся: Гора бо святая и явственная Богу в Небесныя обители превышше вземлется, Небо земное в Небесное и нетленное селение вселяемо.

Жизни присносущныя и лучшия смерть Твоя бысть прехождение, Чистая, от привременныя к Божественней воистину и непреходимей преставляя Тя, Чистая, в веселии Сына зрети Твоего и Господа.

Взяшася двери Небесныя, и Ангели воспеша, и прият Христос девства Своея Матере сосуд; Херувими подъяша Тя с веселием, Серафими же славят, радующеся.

Песнь 5

Ирмос: Божию и неизреченную доброту добродетелей Твоих, Христе, исповем: от Присносущныя бо Славы Соприсносущное и Ипостасное возсиявый Сияние, из девственныя утробы сущим во тьме и сени воплощся, возсиял еси Солнце.

Яко на облаце, Дево, апостольский лик носимь, к Сиону от конец служити Тебе, Облаку легкому, собирашеся: от Неяже Вышний Бог сущим во тьме и сени Праведное возсия Солнце.

Труб богоприятнии языцы богословных мужей благогласнейше Богородице вопияху, исходную возглашающе песнь Духом: радуйся, нетленный Источниче Божия живоначальнаго и спасительнаго всем воплощения.

Песнь 6

Ирмос: Морский пучинородный китов внутренний огнь — тридневнаго Твоего погребения проображение, егоже Иона пророк показася. Спасен бо, яко и предпослася, неврежден, вопияше: пожру Ти со гласом хваления, Господи.

Дает Тебе яже превыше естества Царь всех Бог: в рождестве бо Деву якоже сохрани, тако во гробе тело соблюде нетленно и спрослави Божественным преставлением, честь Тебе, яко Сын Матери, даруя.

Воистину Тя, яко светел свещник невещественнаго Света, кадильницу златую Божественнаго Угля, во Святая святых всели, ручку и жезл, скрижаль богописанную, ковчег святый, трапезу Слова жизни, Дево, Рождество Твое.

Кондак, глас 2

В молитвах Неусыпающую Богородицу и в предстательствах непреложное упование гроб и умерщвление не удержаста: якоже бо Живота Матерь к животу престави во утробу Вселивыйся приснодевственную.

Огради моя помышления, Христе мой, ибо Стену мира воспети дерзаю, Чистую Матерь Твою, на столпе глагол укрепи мя и в тяжких мыслех заступи мя, Ты бо взывающим и просящим верою моления исполняеши. Ты мне убо даруй язык приносен и помысл непостыден: всякое бо даяние сияния от Тебе низпосылается, Светоподателю, во утробу вселивыйся приснодевственную.

Песнь 7

Ирмос: Безстудней ярости же и огню Божественное желание сопротивляяся, огнь убо орошаше, ярости же смеяшеся, богодохновенною словесною преподобных тривещанною цевницею противовещая мусикийским органом посреди пламене: препрославленный отцев и наш Боже, благословен еси.

Богоделанныя скрижали Моисей, писанныя Божественным Духом, яростию сокруши, но сего Владыка Рождшую неврежденну в Небесныя сохрань домы ныне внутрь всели. С Нею играюще, вопием Христу: препрославленный отцев и наш Боже, благословен еси.

В кимвалех — усты чистыми, мусикийски же — сердцем светлым, доброгласною трубою — высокою мыслию, Девы и Чистыя в нарочитый избранный день преставления, детельными плещуще руками, вопием: препрославленный отцев и наш Боже, благословен еси.

Богомудрии, соберитеся, людие: Божия бо славы Селение от Сиона преставляется к Небесному жилищу, идеже глас чист празднующих, глас несказаннаго радования, и в веселии вопиющих Христу: препрославленный отцев и наш Боже, благословен еси.

Песнь 8

Ирмос: Пламень, орошающ преподобныя, злочестивыя же попаляющ, Ангел Божий всемощный показа отроком, живоначальный же источник содела Богородицу, тлю смерти и живот точащу поющим: Содетеля единаго поим, избавленнии, и превозносим во вся веки.

Глаголы последоваху Божественному Ковчегу священному все множество Богословов в Сионе: камо идеши ныне, Скиние,— зовуще,— Бога Живаго? Не престай призирающи верою поющия: Содетеля единаго поем, избавленнии, и превозносим во вся веки.

Якоже, воздевши руце, исходиши, Всенепорочная, руце, имиже Бога носила еси плотию, со дерзновением, яко Мати, рекла еси к Рожденному: яже Ми дал еси, во веки сохрани, вопиющия Тебе: Содетеля единаго поем, избавленнии, и превозносим во вся веки.

Песнь 9

Ирмос: Побеждаются естества уставы в Тебе, Дево Чистая: девствует бо рождество и живот предобручает смерть; по рождестве Дева и по смерти жива, спасаеши присно, Богородице, наследие Твое.

Дивляхуся Ангельския силы, в Сионе смотряюще своего Владыку, женскую душу руками носящаго, пречисто бо Рождшей сынолепно провозглашаше: гряди, Чистая, с Сыном и Богом прославлена буди.

Опрята лик апостольский богоприятное тело Твое, со страхом зряще и гласом велиим вещающе: в Небесныя домы к Сыну восходящи, спасаеши присно, Богородице, наследие Твое.

Светилен

Апостоли, от конец совокупльшеся зде, в Гефсиманийстей веси погребите тело Мое, и Ты, Сыне и Боже Мой, приими дух Мой. (Трижды)

Источник статьи: http://azbyka.ru/days/caa/245

Канон предпразднству Успения Пресвятой Богородицы

Припе́в: Пресвята́я Богоро́дице, спаси́ на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 27 августа (14 августа ст. ст.)

Глас 5.

Ирмо́с: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Гро́бу, Де́ву прие́мшу, присту́пим, ве́рнии, благово́ния боже́ственна прия́ти тща́щеся: в се́м бо излия́ся Мирополо́жницы дыха́ющее благово́ние, ду́ши благоуха́ющее.

Взя́тся Сио́н из горы́, Сио́н одушевле́нный, и почи́ во гра́де Гефсима́нии, я́ко одушевле́н, Бо́га Безсме́ртнаго прие́мши, в не́дрех нетле́нных почи́ти.

Трубы́ возшуме́вше Богоно́сных муже́й, воззови́те вельми́ апо́стольская уста́: Си́лы, возми́те врата́, приими́те Цари́цу в лу́чшая.

Сме́рть ка́ко подъя́т, Живота́ присносу́щнаго я́ве ро́ждшую па́че естества́, Всенепоро́чную? Но, сию́ отри́нув Влады́ка, преста́ви Тя́ к прия́тию Небе́сному.

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Пе́сни надгро́бныя ны́не возсле́м Чи́стей, Зижди́теля Богороди́тельнице, и со Безпло́тными во́инствы о́др живоно́сный окружи́м, ра́дующеся, я́ко престо́л Боже́ственный Святы́й.

Лежа́щу и просте́рту ви́дяще, о́чи смежа́щу, живопода́тельный, Боже́ственный и при́сный исто́чник, прииди́те, ве́рными сердцы́ сле́зы точа́ще, прико́снемся Сея́ нетле́нному телеси́.

Боже́ственное и благоро́дное Бо́жие жили́ще, седа́лище вои́стинну и гра́д одушевле́н все́х Царя́ вои́стинну, пода́ждь все́х согреше́ний на́ших па́мятию Твое́ю оставле́ние и от бе́д спаси́.

Де́вы отрокови́цы, предвоспо́йте, ма́тери, похвали́те, и вси́ воспо́йте пе́снь происхо́дную, успе́ние Де́вы и Ма́тере Госпо́дни пе́сньми богокра́сными предсоверша́юще боже́ственне: преставля́ется бо сла́вно к Небе́сным.

Ирмо́с: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Небе́снии ли́цы веселя́тся и уготовля́ются Бо́жию Чи́стую Ма́терь прия́ти, Цари́цу все́ми тва́рьми благоче́стно госпо́дствующую.

Да уклоня́тся возду́шнии ду́си, да отсту́пит же са́мый мироде́ржец, да па́дает посра́млен, ви́дя возноша́ему Бо́жию Ма́терь.

Не ктому́ обра́зно в гада́ниих, свяще́нники ковче́г заве́та носи́м е́сть: святы́ми апо́столы вои́стинну Бо́жия Ма́ти носи́ма е́сть.

Усну́вши в боже́ственное поко́ище, почи́ла еси́ в жи́зненных сокро́вищах немину́ющих, Голуби́це Соломо́ня, добра́ же, и красна́, и всечестна́.

Ирмо́с: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Чи́стое Ду́ха Пресвята́го боже́ственное селе́ние, на Сина́йстей горе́ бы́в, дохну́, и всю́ тва́рь па́че естества́ просвети́.

Всего́ Божества́ была́ еси́ жили́ще, те́мже Тя́ Божество́ всю́, Ма́ти, до конца́ преста́ви, от земли́, Богороди́тельнице, к Небеси́ прехо́дну.

Иису́с Пребоже́ственный сла́вы Госпо́дь, от Твоего́ чре́ва рожде́йся за милосе́рдие, Са́м Тя́ преста́ви от земли́, Богома́ти, с душе́ю и те́лом.

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя́, я́ко Благоутро́бен.

Со А́нгелы теце́м, со Арха́нгелы же, и Властьми́, и Нача́лы, и Престо́лы, и Си́лами в Сио́н, вели́кое чу́до у́зрим.

Я́же Живота́ Роди́тельница, ка́ко подъя́т сме́рть тле́нну, убежа́вши вся́кия тли́? Но вои́стинну Твоя́ па́че естества́, Чи́стая Де́во, та́инства.

Сио́няне ели́цы, свещи́ возжжи́те, све́том Обложе́нную, прииди́те, усря́щем в Гефсима́нии, и Сию́ пе́сньми прово́дим.

В сла́вней па́мяти Твое́й вселе́нная, невеще́ственным Ду́хом испещре́на, у́мно с весе́лием зове́т Тебе́: ра́дуйся, Де́во, христиа́н похвало́.

И́же на о́блацех све́тло от все́х коне́ц собра́вый Своя́ боже́ственныя апо́столы к те́лу Твоему́, Чи́стая, показа́ Тя́ все́м, Богоро́дицу, и стра́шен черто́г преукра́шен, Бо́г и Сы́н Тво́й бы́в, взе́м ду́шу Твою́ на ру́ку пречи́стую, положи́л е́сть в раи́: та́мо бо живо́тное е́сть дре́во, от него́же я́дше ме́ртвеннии, безсме́ртие обрето́ша Тобо́ю. Те́мже и вопие́м Тебе́: ра́дуйся, Де́во, христиа́н похвало́.

Ирмо́с: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Свяще́нничестии собо́ри, люде́й составле́ния, отрокови́цы вся́, де́вы, лику́юще, воспо́йте Де́вы преставле́ние боже́ственное.

Зако́на и благода́ти лу́чшии, Богороди́тельницы успе́ние хвали́те, пою́ще, согла́сно воспева́юще: Бо́же, благослове́н еси́.

В Сио́н Пречи́стая преставля́ется дне́сь, святы́х во свята́я, гора́ свята́я и вели́кая, Е́йже вопие́м: ра́дуйся, Пренепоро́чная.

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Цари́це все́х же́н, Де́во, мольбу́ принеси́ Христу́ о соверша́ющих любо́вию па́мять Твою́ сию́, и превознося́щих во вся́ ве́ки.

Я́ко светови́дно, освяще́нное добро́тою Божества́, лице́ Твое́, Пренепоро́чная, сла́вою сия́ющее боже́ственнаго де́вства, преукраше́ннаго во вся́ ве́ки.

Глаго́лати не могу́, изумева́юся, и трепе́щу, и весьма́ соску́товаюся, Твоя́ превели́кая: но, любо́вь, Де́во, зря́щи, Боже́ственными возмзди́ дарова́нии непреста́нно.

Ирмо́с: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Бла́гоже, бла́гоже Ты́ укра́шена, Неве́сто, Богома́ти Де́во: о Тебе́ бо поползнове́ние испра́вися Ада́мово и Е́вино побежде́ние всегуби́тельное. Те́м Тя́ вси́ пе́сньми непреста́нно велича́ем.

Сла́ву по достоя́нию Тебе́ Бо́г подава́ет, я́ко Влады́ка Тво́й, Де́во, мы́ же что́ Тебе́ принесе́м, худи́и? Но приими́ то́чию усе́рдие, и Тя́ любо́вию чту́щих я́ко Богоро́дицу, сохраня́й.

Я́коже Вы́шний, соше́д, про́йде из боку́ Твое́ю, Де́во, на́с посети́л е́сть, из Тебе́, Богоневе́сто, подо́бящися Ему́, посети́ от Небе́сных черто́г певцы́ Твоя́ па́мятию Твое́ю.

Побе́ду правосла́вному во́инству на́шему пода́ждь, усе́рдно иму́щему честно́е Твое́ погребе́ние, во утвержде́ние при́сное, и почита́ющему па́че па́мять Твою́, Богома́ти, враги́ покаря́ющи.

А́нгели и па́стыри поя́ху рождество́ Твое́ пе́рвее, и ны́не а́нгельстии чи́ни, и апо́стольский ли́к, и вся́к язы́к, Де́во, успе́ние Твое́ пою́т.

І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.

Гро́бꙋ дв҃ꙋ прїе́мшꙋ пристꙋ́пимъ вѣ́рнїи, благово́нїѧ бжⷭ҇твенна прїѧ́ти тща́щесѧ, въ се́мъ бо и҆злїѧ́сѧ мѷрополо́жницы дыха́ющее благово́нїе, дꙋ́шы благоꙋха́ющее.

Взѧ́тсѧ сїѡ́нъ и҆зъ горы̀, сїѡ́нъ ѡ҆дꙋшевле́нный, и҆ почѝ во гра́дѣ геѳсїма́нїи, ꙗ҆́кѡ ѡ҆дꙋшевле́нъ, бг҃а безсме́ртнаго прїе́мши, въ нѣ́дрѣхъ нетлѣ́нныхъ почи́ти.

Трꙋбы̑ возшꙋмѣ́вше бг҃оно́сныхъ мꙋже́й воззови́те вельмѝ а҆пⷭ҇льскаѧ ᲂу҆ста̀: си̑лы, возми́те врата̀, прїими́те цр҃и́цꙋ въ лꙋ̑чшаѧ.

Сме́рть ка́кѡ под̾ѧ́тъ, живота̀ присносꙋ́щнаго ꙗ҆́вѣ ро́ждшꙋю па́че є҆стества̀, всенепоро́чнꙋю; но сїю̀ ѿри́нꙋвъ влⷣка, преста́ви тѧ̀ къ прїѧ́тїю нбⷭ҇номꙋ.

І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче.

Пѣ̑сни надгрѡ́бныѧ ны́нѣ возсле́мъ чи́стѣй, зижди́телѧ бг҃ороди́тельницѣ, и҆ со безпло́тными во́инствы ѻ҆́дръ живоно́сный ѻ҆крꙋжи́мъ ра́дꙋющесѧ, ꙗ҆́кѡ престо́лъ бжⷭ҇твенный ст҃ы́й.

Лежа́щꙋ и҆ просте́ртꙋ ви́дѧще, ѻ҆́чи смѣжа́щꙋ, живопода́тельный, бжⷭ҇твенный и҆ при́сный и҆сто́чникъ, прїиди́те, вѣ́рными сердцы̀ сле́зы точа́ще, прико́снемсѧ сеѧ̀ нетлѣ́нномꙋ тѣлесѝ.

Бжⷭ҇твенное и҆ благоро́дное бж҃їе жили́ще, сѣда́лище вои́стиннꙋ и҆ гра́дъ ѡ҆дꙋшевле́нъ всѣ́хъ цр҃ѧ̀ вои́стиннꙋ, пода́ждь всѣ́хъ согрѣше́нїй на́шихъ па́мѧтїю твое́ю ѡ҆ставле́нїе, и҆ ѿ бѣ́дъ спасѝ.

Сѣда́ленъ, гла́съ д҃.

Дѣ̑вы ѻ҆трокови̑цы, предвоспо́йте, ма́тєри, похвали́те и҆ всѝ воспо́йте пѣ́снь происхо́днꙋю, ᲂу҆спе́нїе дв҃ы и҆ мт҃ре гдⷭ҇ни, пѣ́сньми бг҃окра́сными предсоверша́юще бжⷭ҇твеннѣ: преставлѧ́етсѧ бо сла́внѡ къ нбⷭ҇нымъ.

І҆рмо́съ: Бжⷭ҇твенное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ, спастѝ пома̑занныѧ твоѧ̑ прише́лъ є҆сѝ.

Нбⷭ҇нїи ли́цы веселѧ́тсѧ, и҆ ᲂу҆готовлѧ́ютсѧ бж҃їю чи́стꙋю мт҃рь прїѧ́ти, цр҃и́цꙋ всѣ́ми тва́рьми благоче́стнѡ гдⷭ҇ствꙋющꙋю.

Да ᲂу҆клонѧ́тсѧ воздꙋ́шнїи дꙋ́си, да ѿстꙋ́питъ же са́мый мїроде́ржецъ, да па́даетъ посра́мленъ, ви́дѧ возноша́емꙋ бж҃їю мт҃рь.

Не ктомꙋ̀ ѻ҆бра́знѡ въ гада́нїихъ, свѧще́нники ковче́гъ завѣ́та носи́мь є҆́сть: ст҃ы́ми а҆пⷭ҇лы вои́стиннꙋ бж҃їѧ мт҃и носи́ма є҆́сть.

Оу҆снꙋ́вши въ бжⷭ҇твенное поко́ище, почи́ла є҆сѝ въ жи́зненныхъ сокро́вищахъ неминꙋ́ющихъ, голꙋби́це соломѡ́нѧ, дѡбра̀ же и҆ красна̀ и҆ всечⷭ҇тна.

І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ благоꙋтро́бенъ.

Чи́стое дх҃а прест҃а́гѡ бжⷭ҇твенное селе́нїе, на сїна́йстѣй горѣ̀ бы́въ дохнꙋ̀, и҆ всю̀ тва́рь па́че є҆стества̀ просвѣтѝ.

Всегѡ̀ бж҃ества̀ была̀ є҆сѝ жили́ще: тѣ́мже тѧ̀ бжⷭ҇тво̀ всю̀, мт҃и, до конца̀ преста́ви ѿ землѝ, бг҃ороди́тельнице, къ нб҃сѝ прехо́днꙋ.

І҆и҃съ пребжⷭ҇твенный сла́вы гдⷭ҇ь, ѿ твоегѡ̀ чре́ва рожде́йсѧ за милосе́рдїе, са́мъ тѧ̀ преста́ви ѿ землѝ, бг҃ома́ти, съ дꙋше́ю и҆ тѣ́ломъ.

І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведѝ мѧ̀, ꙗ҆́кѡ благоꙋтро́бенъ.

Со а҆́гг҃лы теце́мъ, со а҆рха́гг҃лы же и҆ властьмѝ, и҆ нача́лы и҆ прⷭ҇то́лы, и҆ си́лами въ сїѡ́нъ, вели́кое чꙋ́до ᲂу҆́зримъ.

Ꙗ҆́же живота̀ роди́тельница, ка́кѡ под̾ѧ́тъ сме́рть тлѣ́ннꙋ ᲂу҆бѣжа́вши всѧ́кїѧ тлѝ; но вои́стиннꙋ твоѧ̑ па́че є҆стества̀, чⷭ҇таѧ дв҃о, та̑инства.

Сїѡ́нѧне є҆ли́цы свѣщы̀ возжжи́те, свѣ́томъ ѡ҆бложе́ннꙋю, прїиди́те, ᲂу҆срѧ́щемъ въ геѳсїма́нїи, и҆ сїю̀ пѣ́сньми прово́димъ.

Конда́къ, гла́съ д҃.

Въ сла́внѣй па́мѧти твое́й вселе́ннаѧ невеще́ственнымъ дх҃омъ и҆спещре́на, ᲂу҆́мнѡ съ весе́лїемъ зове́тъ тебѣ̀: ра́дꙋйсѧ, дв҃о, хрⷭ҇тїа́нъ похвало̀.

И҆́же на ѻ҆́блацѣхъ свѣ́тлѡ, ѿ всѣ́хъ конє́цъ собра́вый своѧ̑ бжⷭ҇твєнныѧ а҆пⷭ҇лы, къ тѣ́лꙋ твоемꙋ̀, чⷭ҇таѧ, показа̀ тѧ̀ всѣ̑мъ бцⷣꙋ, и҆ стра́шенъ черто́гъ преꙋкра́шенъ, бг҃ъ и҆ сн҃ъ тво́й бы́въ, взе́мъ дꙋ́шꙋ твою̀ на рꙋ́кꙋ пречи́стꙋю, положи́лъ є҆́сть въ раѝ: та́мѡ бо живо́тное є҆́сть дре́во, ѿ негѡ́же ꙗ҆́дше ме́ртвеннїи, безсме́ртїе ѡ҆брѣто́ша тобо́ю. тѣ́мже и҆ вопїе́мъ тебѣ̀: ра́дꙋйсѧ, дв҃о, хрⷭ҇тїа́нъ похвало̀.

І҆рмо́съ: Превозноси́мый ѻ҆ц҃є́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.

Свѧще́нничестїи собо́ри, люде́й составлє́нїѧ, ѻ҆трокови̑цы всѧ̑, дѣ̑вы ликꙋ́юще воспо́йте, дв҃ы преставле́нїе бжⷭ҇твенное.

Зако́на и҆ благода́ти лꙋ́чшїи, бг҃ороди́тельницы ᲂу҆спе́нїе хвали́те пою́ще, согла́снѡ воспѣва́юще: бж҃е, бл҃гослове́нъ є҆сѝ.

Въ сїѡ́нъ пречⷭ҇таѧ преставлѧ́етсѧ дне́сь, ст҃ы́хъ во ст҃а̑ѧ, гора̀ ст҃а́ѧ и҆ вели́каѧ, є҆́йже вопїе́мъ: ра́дꙋйсѧ, пренепоро́чнаѧ.

І҆рмо́съ: Тебѣ̀ вседѣ́телю, въ пещѝ ѻ҆́троцы всемі́рный ли́къ спле́тше, поѧ́хꙋ: дѣла̀ всѧ̑каѧ, гдⷭ҇а по́йте, и҆ превозноси́те во всѧ̑ вѣ́ки.

Цр҃и́це всѣ́хъ же́нъ дв҃о, мольбꙋ̀ принесѝ хрⷭ҇тꙋ̀ ѡ҆ соверша́ющихъ любо́вїю па́мѧть твою̀ сїю̀, и҆ превозносѧ́щихъ во всѧ̑ вѣ́ки.

Ꙗ҆́кѡ свѣтови́дно ѡ҆свѧще́нное добро́тою бж҃ества̀, лицѐ твоѐ, пренепоро́чнаѧ, сла́вою сїѧ́ющее бжⷭ҇твеннагѡ дѣ́вства, преꙋкраше́ннагѡ во всѧ̑ вѣ́ки.

Глаго́лати не могꙋ̀, и҆зꙋмѣва́юсѧ и҆ трепе́щꙋ, и҆ весьма̀ соскꙋ́товаюсѧ, твоѧ̑ превели̑каѧ: но любо́вь, дв҃о, зрѧ́щи, бжⷭ҇твенными возмздѝ дарова̑нїи непреста́ннѡ.

І҆рмо́съ: И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ.

Бла́гоже, бла́гоже ты̀ ᲂу҆кра́шена невѣ́сто, бг҃ома́ти дв҃о: ѡ҆ тебѣ̀ бо поползнове́нїе и҆спра́висѧ а҆да́мово, и҆ є҆́ѵино побѣжде́нїе всегꙋби́тельное. тѣ́мъ тѧ̀ всѝ пѣ́сньми непреста́ннѡ велича́емъ.

Сла́вꙋ по достоѧ́нїю тебѣ̀ бг҃ъ подава́етъ, ꙗ҆́кѡ влⷣка тво́й, дв҃о: мы̀ же что̀ тебѣ̀ принесе́мъ хꙋді́и; но прїимѝ то́чїю ᲂу҆се́рдїе, и҆ тѧ̀ любо́вїю чтꙋ́щихъ ꙗ҆́кѡ бцⷣꙋ, сохранѧ́й.

Ꙗ҆́коже вы́шнїй соше́дъ про́йде и҆зъ бокꙋ̀ твоє́ю, дв҃о, на́съ посѣти́лъ є҆́сть, и҆зъ тебє̀, бг҃оневѣ́сто: подо́бѧщисѧ є҆мꙋ̀, посѣтѝ ѿ нбⷭ҇ныхъ черто́гъ пѣвцы̀ твоѧ̑, па́мѧтїю твое́ю.

Побѣ́дꙋ правосла́вномꙋ во́инствꙋ на́шемꙋ пода́ждь, ᲂу҆се́рднѡ и҆мꙋ́щемꙋ честно́е твоѐ погребе́нїе, во ᲂу҆твержде́нїе при́сное, и҆ почита́ющемꙋ па́че па́мѧть твою̀, бг҃ома́ти, врагѝ покарѧ́ющи.

А҆́гг҃ли и҆ па́стыри поѧ́хꙋ ржⷭ҇тво̀ твоѐ пе́рвѣе, и҆ ны́нѣ а҆́гг҃льстїи чи́ни, и҆ а҆пⷭ҇льскїй ли́къ, и҆ всѧ́къ ꙗ҆зы́къ, дв҃о, ᲂу҆спе́нїе твоѐ пою́тъ.

Источник статьи: http://www.akafistnik.ru/kanony-ko-gospodu-i-prazdnikam/kanon-predprazdnstvu-uspeniya-presvyatoj-bogoroditsy/